دلوني على العينين السوووووووووود وعلقوني
يا ليل الليل الما لو حدوووووووووود خبيلي عيوني …
قديش هالغنية ضربت وقديش غنيناها بالحفلات والمناسبات والرحلات ومشاوير شم الهوا وقديش من بعدها سمعنا أغاني كمان ضربت وانشهرت بشكل واسع ورسخت بذاكرتنا .. مين ما بيتذكر : نطرني ع الشباك وياي ياي يا ناسيني وساعة نطرني وبلغي كل مواعيدي مع ملحم بركات وبويا بويا مع نصري شمس الدين ويا بو مرعي مع وديع الصافي مع حفظ الألقاب ،، ومين بينسى الصبية الحلوة صاحبة هالأغاني الحلوة الممثلة والمغنية الست جورجيت صايغ اللي تعودنا على ظهورها الدائم في مسرحيات وسهريات الرحابنة وخصوصاً دورها بمسرحية سهرية لزياد الرحباني سنة ١٩٧٣ ..
جورجيت صايغ بنت منطقة الشياح كرم الزيتون هي البنت البكر لوالدها الياس صايغ ووالدتها روزه حبيقة .. يوم ميلادها كان الجمعة ٥ تشرين الأول سنة ١٩٤٥ وهي الأخت الكبيرة لصوفي وجورج وأنيسة ومارك وأسامة ،، وظهرت على التلفزيون مؤخراً بلقاء مطول بعد غياب طويل .. للست جورجيت اللي منحبها ومن صفحة صور نادرة من لبنان منتمنالها العمر الطويل والصحة والعافية وراحة البال وحتى لو ما تكرمت ونالت حقها على المستوى الرسمي ،، بيكفي إنها مكرمة بقلوبنا وقلوب محبينها وهني كتار على مستوى الوطن وعلى مستوى العالم العربي
